Veldblom

Dis 'n koue dag in Nelspruit en dit lyk asof die natuur nog rustig slaap so in die mistigheid, al is dit al lankal opstaantyd gewees. Alles voel so stil.
 
Vanoggend 6-uur het ons die voorreg gehad om ons stilwordtyd in die kerk te kon geniet. Die kerk se deure staan vandag tot 14:00 oop vir enigeen om op sy/haar eie tyd sommer net daar te gaan stilword en persoonlik met die nagmaal bedien te word. Met die instap, terwyl sagte musiek speel vanoggend, het ons 'n blaadjie ontvang om ons te begelei in ons stiltetyd.

• Die ONTMOETING-gedeeltes was uit Gal 1:3-5 en Luk 15:17-24.
• "STIL" LOFPRYSING  "ek loof U want U is...."
• VEROOTMOEDIGING Jes. 59:1+2
• GENADEVERKONDIGING 1Joh1:9, Rom5:1-2 en Ef2:8-9

Hierna in die blaadjie,: "Kry voor jou die beeld van Christus wat aan die kruis hang en hoor dat Hy sê :

• Ek het dit vir jou gedoen (... jou naam)
• Ek het jou ... lief
• Deur my bloed word jy afgewas.
• Deur my liggaam word jy genees en versterk.

In haar dogtertjiehande hou sy drie geel blommetjies vas. Met uitgestrekte armpies bied sy hulle aan en sê:''dis vir tannie'', en toe ek hulle verras en dankbaar ontvang, omsingel die dogtertjie-arms my.

En so kom sy met haar spontane kindwees, my grootmensruimte sommer so onverwags binne. Ek voel hoe ‘n warmte oor my hart streel en hoe my gedagtes soos spookasem word. Skielik het my besigwees verander in  oomblikke van totale vrywees, oomblikke van  weggevoer  raak in haar kind-stories. En sommer so, raak grootwees se kommer en wonder, soos stof in die wind.

Want in hierdie kindwees-wêreld is alles eenvoudig en word aanvaarding en liefde sonder ''aanbod en aanvraag'' uitgedeel en ontvang. En terwyl ek so na haar sit en luister, weet ek hierdie gevoel is vir my bekend. Want, ek is elke dag kind. Weg van die geraas van die wêreld, kan ek elke dag my drome deel, my vreugdes, my hartseer.....met my Heer wat langs my sit. En ek kan luister na sy stem, en toelaat dat sy beloftes my wegvoer na hoër plekke.

En dis binne hierdie beloftes wat ek opgewonde, met oop arms, in die rondte kan draai saam met die vlinders in die veld   en kan opkyk na die hemelkoepel:''Hy span die hemel oop soos n tent vir die mense om onder te woon.'', en verseker kan weet dat ek onder hierdie woning, beskermend leef. Want elke belofte uit ons Heer se Woord, gee my nuwe moed teen elke wêreldaanslag. ''....die wat op die Here vertrou, kry nuwe krag. Hulle vlieg met arendsvlerke, hulle hardloop en word nie moeg nie, hulle loop en raak nie afgemat nie.'' Jes40:22-31

Ek bid vir jou genoeg moed vir elke dag, sodat jy nooit sal wil ophou hoop nie.

Kyk mooi stadig, dan sal jy ook die verskillende kleure in die fyn blaartjies sien. Die wit, geel, pienk en pers!

Die oggendstilte roep my buitekant toe.  Soos elke oggend, gaan staan ek eers en kyk by die kombuisvenster uit en glimlag sommer oor die kosmosplantjies wat kiertsregop in die bedding staan.  En soos die afgelope oggende, wonder ek wanneer ek daardie eerste blommetjie gaan sien.

Ek draai om, om die deur se sleutel te kry, en dis met die beweging dat my oog die pienk spikkel vang. Ek kyk en kyk weer en ja, sowaar, daar ís ‘n blommetjie! Met ‘n haastige opgewondenheid sluit ek die kombuisdeur oop en spring by die trappies af. Met groot dankbaarheid gaan hurk ek langs die bedding. Dankbaar dat hierdie saadjies wat ek nog nie eens een keer nodig gehad het om nat te gooi nie, nou as plantjies welig in die bedding staan. En dankbaar dat ek op hierdie vroeë oggend, in hierdie stilte, die eerste blommetjie se oopgaan mag beleef.

Vlinders dans die hele lug vol, en in stede van in die motor te wees, voel dit asof die wind my eerder hier by die oop venster wil uitwarrel om saam met die vlinders te gaan speel.

By die stopstraat draai ek links, soos die pad muurbalbaan toe tussen die bergkoppe deur kronkel, en ek wonder opnuut toe ek haar sien.  Sy is ‘n pragtige vrou wat die afgelope twee weke elke middag hierdie hele ent pad flink stap, en ek wonder of sy ook vandag die vlinders om haar sien speel. Weer wonder ek ook of sy van die werk afkom of daarheen oppad is.