Die wind maak my wakker en die ritme daarvan vul my rustig, met klanke soos van n simfonie. Woorde volg asof reeds vooruit beplan, en kan ek nie anders as om na buite weggevoer te word op die maat van eng’lemusiek : ''Praat ek mense, eng’letale maar dis nie uit liefde nie, is my woorde hol simbole klanke sonder melodie. Al kan ek geheime uitlê, berge deur geloof versit. Of al het ek al die kennis, sonder liefde is ek niks.'', dans ek in die vroeë oggend-ure onder die neutboom wat blaremusiek maak.
En alles is lig en vry en vrolik, en ek sweef saam met engele tussen woorde … tussen stilwees … tussen vashou … tussen vrywees. Ek is nêrens, maar ek behoort. Ek is vry, maar ek is geborge. Niemand is om my, maar die Teenwoordige vul my. Ek IS net. Is net, wie ek gemaak is om te wees. Kind van God. Medebewoner hier op aarde, waar ek my kan verlustig in die berge se blou, die wolke se wit, die bome se groen. Waar ek kan liefhê en kan weet, dit maak nie saak nie, ek is veilig. Want die Gees van die waarheid het gese :''As iemand My liefhet, sal hy my woorde ter harte neem; en my Vader sal hom liefhê, en Ons sal na hom toe kom en by hom woon.''Joh14:15-27.
En binne hierdie liefde vind ek geen hol klanke. Ek vind n melodie, vreemd vir hierdie wêreld. n Melodie wat vrede bring. n Melodie wat elke mens saamnooi op sy ritme. Kom, kom lewe in hierdie liefde.....''Soos die Vader My liefhet, het Ek julle ook lief. As julle my opdragte uitvoer,sal julle in my liefde bly, net soos Ek die opdragte van my Vader uitvoer en in sy liefde bly. Dit sê Ek vir julle sodat my blydskap in julle kan wees en julle blydskap volkome kan wees.'' Joh15:9-17.
Daardie blydskap. Daardie volkome blydskap!
Mag jy die oorvloed daarvan binne jou beleef, sodat jou woorde n melodie van liefde word. n Melodie wat jou saam met die winterwind laat dans, en die mens langs jou uitnooi om saam met jou die vreugde te deel.
Liefde : Caroline
